Toneel

Die Bloemhof-toneelgroep neem jaarliks aan ten minste drie interskool-kompetisies deel. Die groep het die afgelope paar jaar groot sukses behaal in die finale-afdeling van die ATKV se Tienertoneelfees. In 2012, 2013 en 2015 eindig hulle 1ste in Suid-Afrika. In 2017 word hulle as die naaswenners van dié gesogte toneelkompetisie aangewys en in 2018 as die algehele wenners.

Die leerders is van die toptalent in die land en baie kan sing, dans en toneelspeel. Hierdie talente word deur sowel die choreografie en tegniese aspekte, in stukke wat spesiaal vir hulle geskryf word, ten toon gestel. Die mikpunt is egter om talent te ontwikkel en die ervaring te geniet.  Met die oog op ontwikkeling van talent word daar in 2019 twee toneelstukke aangebied en albei van hierdie word deur die leerders geskryf en ontwikkel. 

Volgende optrede:

TONEEL

Maandag & Dinsdag, 29 & 30 Julie
19:00
Adam Small-teater | Stellenbosch

Kaartjies by die betaalkantoor en die toneelgeselskap beskikbaar.

In die nuus

Bloemhof se toneelspelers is reeds maande lank aan’t repeteer en hul harde werk is dié naweek vir die eerste keer by die Namakwaland Toneelfees op Springbok aanskou.


Die produksie “Buite.Buite.Buite”, met regie deur Reuben Murphy en ‘n teks wat deur die geselskap ontwikkel is, word vir beste regie benoem en die ensemble en regisseur ontvang goud.

Vanjaar het Bloemhof ook ’n “leerderproduksie” — Ané Conradie en Nichola Viviers (graad 11) behartig die regie van “Umh…”, ‘n teks wat deur hulle twee ontwikkel is. Die regisseuses ontvang silwer en die ensemble goud.

Verder word Thina Gabavana (graad 11) vir Mees Belowendste Aktrise genomineer. Sy bring dan ook dié trofee terug Stellenbosch toe!

“Uhm” en “Buite.Buite.Buite.” is op 29 en 30 Julie in die Adam Small-ouditoriun (die ou HB Thom-teater) saam met Hoërskool Stellenbosch se produksie “Donkievel” te sien. Kaartjies is by die betaalkantoor beskikbaar.