OPEDAG

Ouers/voogde en leerders het vrae ingestuur wat ons hier beantwoord.

• Gebruik die oortjies “tabs” om vinnig by antwoorde uit te kom.
• Enige ander vrae kan aan kommunikasie@bloemhofschool.co.za gestuur word en sal hier bygevoeg word.

Is daar plek in Bloemhof vir gewone gemiddelde kinders? Die wat hulle werk doen, hulle belangstellings ontwikkel – nie noodwendig elke kwartaal ‘n A-gemiddeld het nie, en ook nie op laerskool ‘n A- of B-span in enige sportsoort haal nie.
Ja, Bloemhof het beslis plek vir gewone, gemotiveerde kinders wat hul werk doen en hul belangstellings wil ontwikkel, al is hulle nie altyd toppresteerders in akademie of sport nie. Hoewel die skool bekend is vir sy hoë standaarde, fokus ons ook daarop om elke leerder holisties te ondersteun en geleenthede in ’n wye verskeidenheid aktiwiteite – van kultuur tot gemeenskapsbetrokkenheid – te bied.
Wat belangrik is, is dat leerders ’n positiewe ingesteldheid moet hê en bereid is om deel te neem en hul beste te probeer. Dis vir ons personeel ‘n voorreg om by Bloemhof te beleef hoe elke leerder op haar eie unieke wyse blom van gr.8 tot gr.12, ongeag hulle verskillende gawes, belangstellings en talente.

Waarom sal my kind goed aanpas in Bloemhof?
Bloemhof het ‘n sterk ondersteuningsnetwerk en ‘n motiverende akademiese kultuur wat elke leerder aanmoedig om hul volle potensiaal te bereik. Die mentor- en tutorprogramme help leerders ook om hulle voete te vind.

Wat is die grootte van die klasgroepe?
Daar is ± 140 leerders per graad en ±36 leerders in ’n klas.

Wat maak Bloemhof uniek van ander skole?
Daar is vyf faktore wat daartoe bydra dat Bloemhof uniek is:

• Dit is ’n enkelgeslagskool en ons poog om jong vroue aan die einde van hul skoolloopbaan met selfvertroue en verskeie vaardighede die wêreld in te stuur.
• Ons fokus op moedertaalonderrig – ja, die wêreld is besig om te verengels, maar ons glo dat onderrig in Afrikaans vir Afrikaanse kinders noodsaaklik is en dat dit hulle help om optimaal te ontwikkel.
• Waardes lei ons, en nie reëls nie. Bloemhoffers koop in OWARI in: Omgee, werksetiek, afgerondheid, respek, en integriteit word deel van hulle menswees. Ons het bv. geen detensiestelsel nie.
• By Bloemhof moet “skool” met “lekker” vereenselwig – om pret te hê, is een van ons stategiese doelwitte en verskeie aktiwiteite word vir die leerders gereël sodat hulle eendag met heimweë aan hul skooldae kan terugdink.
• Potensiaal is belangriker as prestasie. Leerders word nie gedruk om te presteer nie, maar dát ons leerders akademies en op die gebied van sport en kultuur uitblink, is die som van al die bogenoemde.

Is Bloemhof die beste skool vir my dogter?
Die eerlike antwoord: Ons weet nie. Slegs die ouer en leerder kan besluit of Bloemhof die beste keuse is. By Bloemhof is dit belangrik vir dogters om hul potensiaal te ontdek en te ontwikkel. Ons is nie prestasiegedrewe nie en wil die beste vir elke leerder hê.

Het die skool goeie norme en waardes ?
Bloemhof se vyf waardes bepaal ons gesindheid en gedrag. Nuwe Bloemhoffers teken ‘n Waarde- en Gedragskode, waarin hierdie waardes en die verwagte gedrag duidelik uiteengesit word. Ons waardes wat ons graag uitleef, is: omgee, werksetiek, afgerondheid, respek en integriteit.

Hoeveel interaksie is daar met Paul Roos studente op akademiese, asook sport, kultuur en sosiale vlak?
Bloemhof en Paul Roos Gimnasium is twee aparte skole, maar daar is heelwat geleenthede vir Bloemhoffers om interaksie met ons broerskool te geniet. Veral ons VRL identifiseer geleenthede en behoefte wat dan deur die personeel opgevolg word. Jaarlikse gebeure waar die twee skole interaksie geniet, is tydens die verwelkomingsweek, by die Prestige Atletiek (waar ons as BloemRoos deelneem) en die Bekoor-sangfees.

Is Bloemhof akademies sterk?
Bloemhof is sinoniem met akademiese uitnemendheid:

• Die skool het met die 2024 NSS-uitslae die meeste onderskeidings per kandidaat (3,82) van alle skole in Suid-Afrika behaal – dit is ’n baie groot veer in ons hoed.
• Die Departement van Basiese Onderwys het in November 2024 die HMS Bloemhof as die beste kwintiel 5-skool in die land aangewys. Afrikaans Hoër Meisieskool Pretoria was tweede en Rhenish Girls’ High School was derde. Dié toekenning berus op meer as net matriekuitslae en sluit slegs openbare skole in.
• Bloemhof het by die Solidariteit Skoleondersteuningsentrum se prysuitdeling ook die meeste vaktoekennings (9) ontvang.

Wat is die vakke wat graad 8’s gaan neem?
Volledige inligting oor ons vakke is by www.bloemhofschool.co.za/vakkeuses beskikbaar. Graad 8’s en 9’s neem 11 vakke, wat Afrikaans, Wiskunde, Lewensoriëntering, Natuurwetenskappe, Sosiale wetenskappe, Ekonomiese en bestuurswetenskappe en Tegnologie insluit.

• Vir Engels kies leerders tussen Engels Huistaal en Engels Eerste Addisionele Taal
• Verder kies leerders twee van die volgende vakke:
  • Duits Tweede Addisionele Taal
  • Frans Tweede Addisionele Taal
  • Ingenieursgrafika en -ontwerp (IGO)
  • Rekenaarvaardigheid
  • Musiek as vak (in Bloemhof se musiekdepartement)
  • Kuns as vak (by die PJ Olivier, teen addisionele koste)
• Vir Skeppende Kuns kies leerders twee van drie dissiplines wat hulle oor twee jaar volooi:
  • Drama
  • Musiek
  • Kuns

Is Bloemhof se vakkeuses gepas vir my kind se toekoms?
Bloemhof se vakkeuses berei ’n leerder voor vir verskeie loopbaanrigtings. Dit ondersteun ’n leerder op ’n akademiese, tegniese of kreatiewe veld. Die vakke maak loopbaanrigtings soos ingenieurswese, besigheid, kuns en tale moontlik.

Is daar geleenthede vir leerders in graad 10-12 wat nie noodwendig die “Big Six” wil neem nie?
Bloemhof se vakkeuses is al ’n geruime tyd ’n besprekingspunt, want ons is bewus dat leerders wat Fisiese Wetenskappe, Lewenswetenskappe en Rekningkunde (saam met Wiskunde die tradisionele “big six”) neem ’n gemakliker pad met vakkeuses stap. Leerders wat ’n kombinasie van Geskiedenis, Ekonomie, Geografie, Verbruikerstudie en/of RTT wil neem, kom moeiliker daarvan af. Die skoolhoof, me. Maré Bosch, is bewus van die uitdaging en wil graag daarvan werk maak om ons vakkeuses en die groepe waarin dit aangebied word, te hersien.  

Word dans as vak by Bloemhof aangebied?
Nee, ongelukkig word dans nie as ’n vak by die skool aangebied nie. Ons maak egter voorsiening vir leerders wat ander vakke wil neem – ons het bv. leerders wat Spaans en Italiaans as tweede addisionele tale neem en daardie NSS-vraestelle aan die einde van matriek sal skryf. In 2024 het ons ’n leerder gehad wat Mariene Biologie geskryf en geslaag het.

Wat is die kriteria vir plasing by die skool/toelating/keuring vir die aansoek
Aansoeke word op meriete, volgens akademie, sport- en kulturele deelname, asook leierspotensiaal gekeur.

• Indien leerders wat aansoek doen, familie in die skool het of voorheen in die skool gehad het, sal dit in ag geneem word, maar dit verseker nie outomatiese toelating nie.
• Aansoeke moet volledig wees, m.a.w. gesertifiseerde afskrifte van die volgende dokumente moet saam met die aansoek op die WKOD se stelsel gelaai word:
  • Leerder se nuutste rapport (Des. 2024)
  • Leerder se geboortesertifikaat (dit hoef nie “unabridged” te wees nie)
  • Bewys van adres
  • Ouers/voogde se ID’s

Hoe werk die aansoekproses?
Bloemhof hou by die WKOD se riglyne en datums:

• Aansoeke open 11 Maart en sluit op 15 April.
• Ouers kan vrywillig ‘n inligtingsvorm van die skool voltooi, wat vanaf
  11 Maart op ons webwerf beskikbaar sal wees. Indien dit voltooi word, moet dit asseblief voor of op die sluitingsdatum van 15 April by die skool ingehandig word.
• Dié vorm kan vanaf 11 Maart in die skool se voorportaal in ‘n houer geplaas word. Daar sal ook ‘n intekenregister wees om te voltooi. Maandae tot Donderdae: 08:00 – 15:00 en Vrydae: 08:00 – 13:00
• Indien u dit nie in bogenoemde tydgleuwe kan inhandig nie, kan dit ook by sekuriteit gelaat word. ‘n Intekenregister sal ook daar beskikbaar wees. Alternatiewelik kan dit aan die skool gekoerier word, vir aandag AANSOEKE: SKOOLTOELATING / Adéle Uys
• ‘n E-pos sal binne drie (3) werksdae aan ouers gestuur word om ontvangs te bevestig.
• Ouers MOET egter op die WKOD se stelsel aansoek doen. GEEN aansoek sal oorweeg word, indien dit nie op die WKOD se stelsel verskyn nie.
• Gesprekke met ouers/voogde en die leerder kan op versoek van die skoolhoof plaasvind.
• Keuring van aansoeke sal deur die Keuringskomitee behartig word en die uitslag van u dogter se aansoek sal op 30 Mei (soos deur die WKOD gekommunikeer) op die WKOD se stelsel (SAMI) gesien kan word. Suksesvolle leerders en leerders op die waglys sal ook binne ‘n week daarna ‘n e-pos vanaf die skool ontvang.
• Ouers moet voor of op 17 Junie hulle dogter se keuse op die WKOD se stelsel bevestig.
• Let asseblief daarop dat ons ongeveer 140 leerders kan akkommodeer en dat ons jaarliks soveel meer aansoeke ontvang as wat daar beskikbare plekke is. Daar is dus nie ‘n tweede ronde keurings, soos deur die WKOD gekommunikeer nie, aangesien ons sover jaarliks bevoorreg was om reeds die hoeveelheid leerders wat geakkommodeer kan word, met die eerste plasing te kon volmaak.
• Indien u dogter se naam op ‘n waglys geplaas word, sal die skool u kontak sodra daar vir haar ‘n opening is. Plekke beskikbaar is onderhewig aan moontlike kansellasies en waglys-leerders sal nie voor dan geakkommodeer kan word nie.

Is dit moontlik vir ‘n leerling wat nie van graad 8 af by Bloemhof ingeskakel het nie om keuring te kry vanaf graad 9?
Leerders is altyd welkom om aansoek te doen.

• Die WKOD het ‘n nuwe proses in plek gestel vir leerders in gr 9-12 wat van skole wil verander. Hierdie leerders se aansoeke sal eers in Augustus hanteer word. Die proses sal nader aan die tyd op ons webwerf gekommunikeer word.
• Toelating sal bepalend wees tot plek beskikbaar en dieselfde kriteria met betrekking tot keuring geld vir hierdie grade.
• Let asseblief daarop dat leerders in graad 12 slegs in hoogs uitsonderlike gevalle oorweeg word, omdat die skool ‘n vinnige akademiese pas het en ons leerders op geen wyse wil benadeel nie.
• Leerders wat vir senior grade aansoek doen se vakkeuses moet ook by die skool se vakkeuses inpas voor hulle oorweeg kan word.

Watter jare se deelname aan buitemuurse aktiwiteite word in ag geneem tydens die keuringsproses?
Die afgelope twee jaar se deelname word oorweeg.

Is daar enige busdienste by Bloemhof? En watter areas word bedien?
Ja, daar is privaat busdienste en heelwat Bloemhoffers ry van die noordelike voorstede of die Helderberg in:

• Eljosa: 021 9825249
  Areas: Welgemoed, Oude Westhof, Welgedacht, Panorama, Durbanville, Brackenfell, Protea Heights.
• Somerset West Bus Fund: 066 586 6621
  Areas: Croydon, Gordonsbaai, Strand, Somerset-Wes

NEEM KENNIS DAT DIE BUSDIENSTE PRIVAAT IS EN NIE DEUR BLOEMHOF BESTUUR OF GEADMINISTREER WORD NIE.

Hoe kan ek as ouer by die skool betrokke raak?
Die BOOV (Bloemhof Ouer- en Onderwysersvereniging) is ’n vereniging waar Bloemhof-ouers die geleentheid kry om met sosiale byeenkomste te help. Ouers kan hul hulp verskaf en as gasvroue by verskeie funksies optree. Daar is verteenwoordigers per graadgroep.

Ons wil graag meer inligting oor netbal hê.
Netbal is die gewildste sportsoort by Bloemhof en word deur me. Zelda Botha bestuur. Ons het in 2024 die volgende spanne gehad:

• o.14A-H
• o.15A-F
• o.16A-F
• o.17A-B
• o.19A-D

Ons spanne neem in die A-liga deel en vaar baie goed; ons A-spanne neem ook aan verskeie toernooie landwyd deel. Rig gerus enige spesifieke netbalvrae aan me. Botha aan by netbal@bloemhofschool.co.za.

Beoog julle om alle dogters wat netbal wil speel, te akkommodeer?
Netbal is een van Bloemhof se grootste sportsoorte. Daar word jaarliks met baie bekwame afrigters kontrakte gesluit om te verseker dat ons spelers die beste afrigting sal kry. Ons probeer om soveel as moontlik leerders in spanne op te neem en het in 2024 by die o.14’s spanne van A tot H gehad.
Bied julle enige sport behalwe die gewone aan?
Bloemhof bied die volgende sportsoorte aan: atletiek, hokkie, tennis, landloop, netbal, swem en waterpolo. Waterpolo val moontlik buite die “gewone”, maar ons het ook ’n klein groepie leerders wat aktief skaak speel. Tydens Wintersweek (ons kragmeting teen Rhenish) en Interskole (teen Oranje Meisieskool) word skaakwedstryde gespeel en vanjaar sal daar vir die eerste keer skaak by die 4M (die somerinterskole teen Rhenish, HMS Paarl en HMS La Rochelle) wees. 

Is daar enige hoogtepunte op julle sport- en kultuurprogram?
Daar is heelwat sulke hoogtepunte, want om pret te hê, is een van ons strategiese doelwitte.

• Die 4M is ’n sportgeleentheid waar Rhenish, HMS La Rochelle, HMS Paarl en HMS Bloemhof kragte meet – eers op die atletiekbaan, en dan in die swembad. Al die Bloemhoffer en atlete sien hierna uit, want elke skool doen ’n kreet, daar is geleentheid vir dansers om op te tree en dit is ’n geleentheid vir die Bloemhoffers om hul baadjietrots te demonstreet.
• Wintersweek is die jaarlikse kragmeting teen ons susterskool, Rhenish Girls’ High School, en vind gewoonlik aan die einde van Julie plaas. Dit bied goeie voorbereiding vir die Interskole wat op pad is. Spanne kry speelkans, maar dit is ook ’n week waarin daar groot gees onder die leerders is en bande met ons bure versterk word. Behalwe vir netbal- en hokkiewedstryde, speel ons skaak, daar is landloop en redevoering in beide Afrikaans en Engels.
• Interskole: Dis ongetwyfeld dié hoogtepunt op die Bloemhofkalender en ’n fees van susterskap tussen Bloemhof en die C&N Sekondêre Meisieskool Oranje in Bloemfontein waar vriendskap die eintlike wenner is. In 2025 sal ons 27ste interskole plaasvind. Die interskole bevat die besigste program en bestaan nie net uit sportaktiwiteite nie, maar ook op die kultuurfront is daar debat, redenaars, marimbas, orkes, dans, toneel en die koor wat optree. Landloop, swem, netbal, tennis, skaak en hokkie is die sportsoorte waarin meegeding word. Swem was in 2024 vir die heel eerste keer deel van dié interskole. Paul Roos Gimnasium en Grey Kollege neem ook aan die gala deel. Interskole vind om die beurt in Stellenbosch en Bloemfontein plaas.
• Ons verenigings bied deur die jaar verskeie geleenthede aan:
  • Die Mediakomitee bied die geleentheid om in die mediateek te help met tutoring en met navorsing.
  • Leerders kan deel wees van Phoenix, die gemeenskapskomitee, wat fokus op gemeenskapsdiensprojekte.
  • Daar is ook JiB (Jesus in Bloemhof), Terra (vir omgewingsbewustheid) en Equitas (ons nuutste vereniging wat vir gelykheid en sosiale verandering beywer). Klub Momentum, ons fotografievereniging, is baie gewild.
• Toneelfeeste: Die Bloemhof-toneelgroep neem jaarliks aan verskeie kompetisies deel. Die mikpunt is egter om talent te ontwikkel en die ervaring te geniet.
• Debat en redenaars: Ons neem jaarliks aan verskeie kompetisies deel wat die ATKV-debat, Con Spirito en Dink-of-Sinkdebatskompetisies insluit. Redenaars het verskeie kompetisies soos die ATKV-redenaars, Radikale Redenaars en Oppie Tong Af Redenaarskompetisie.

Wat is al die kultuuraktiwiteite waarby my dogter kan betrokke raak?
Daar is verskeie kultuuraktiwiteite wat aangebied word:

• Bloemhof het ’n baie lewendige debat- en redenaarskultuur.
• Vir die sangers is daar die Accelerando Koor, en vanjaar het ons vir die eerste keer oudisies vir ’n sêrgroep gehou.
• Ons het ’n strykorkes met die naam Stringendo.
• Daar is marimbas wat baie gewild is.
• Bloemhof het ’n junior en ’n senior toneelgeselskap.
• Leerders kan aan verskeie verenigings behoort:
  • Phoenix (gemeenskapsinteraksie)
  • Terra (ekovereniging)
  • JiB (Jesus in Bloemhof, ons Christenvereniging)
  • Equitas (ons vereniging vir sosiale verandering)
  • Mediakomitee (slegs vir seniors wat in die mediateek uithelp)
  • Klub Momentum (fotografievereniging)

My dogter is tans in die Engelse kant van De Hoop, maar is goed tweetalig. Is Afrikaans 1ste taal ‘n vereiste vir gr.7?
Nie vir graad 7 nie, al bied Bloemhof slegs Afrikaans as huistaal aan en dit ’n verpligte vak vir alle graad 8-12’s is.

Kan leerders beide Engels en Afrikaans as eerste tale neem?
Ja, leerders kan twee huistale neem. Afrikaans Huistaal is verpligtend, maar leerders kies tussen English Home Language en English First Additional Language. Alle vakke (behalwe tale) word in Afrikaans onderrig.

Hoe weet my kind of sy Engels Huistaal of Engels Eerste Addisionele Taal moet kies?
In die eerste week van die skooljaar skryf die graad 8 leerders ‘n gestandaardiseerde Engelse toets. Die vakhoof maak daarna ‘n aanbeveling op grond van die uitslae, maar dit bly slegs ‘n aanbeveling – leerders kan na afloop van die eksamen steeds van English Home Language na English First Additional Language skuif indien hul dit verkies.

Hoe werk julle opedag?
Ons opedag bestaan uit twee dele:

• Geleentheid om die skool self te verken (15:00-17:30)
• ’n Amptelike inligtingsessie (17:45 in die Sentrum)

Ons vra dat ouers/voogde vooraf vir ons opedag moet registreer – doen so via ’n Google Form by bit.ly/BloemhofOpedag

Wie mag die opedag bywoon?
Die opedag is vir graad 6- en 7-leerders, of vir leerders wat reeds in die hoërskool is en wil kom kyk of Bloemhof die skool vir hulle is.

Wat moet leerders vir die opedag aantrek?
Dra asseblief jou huidige skooluniform – dit is vir ons leerders lekker om hul laerskoolklere te sien!

Is daar ’n geleentheid vir leerders wat nie die opedag kan bywoon nie?
Ja, ons bied ’n tweede geleentheid vir besoekers aan, maar dit is tot Graad 7-leerders en hul ouers beperk. Volg asb. dieselfde skakel om daarvoor te registreer: bit.ly/BloemhofOpedag

Mag ons die koshuis sien?
Natuurlik. Koshuistoere vorm deel van ons opedag, maar ons beperk dit tot leerders en hul ouers/voogde wat verblyf in die koshuis oorweeg. Daar is geleentheid in ons opedagregistrasievorm om belangstelling in die koshuis aan te dui.  

Hoeveel graad 8’s kan daar in die koshuis bly?
Ongeveer 36. Leerders wat nie onmiddellik plek kry nie, word op die waglys geplaas.

Wat is die koshuisgeriewe? En hoe werk goed soos vervoer vir langafstand kinders?
Koshuisleerders het toegang tot al die sportfasiliteite asook die gimnasium op die sportgronde. Daar is musiek oefenkamers in die koshuis. Leerders wat ander buitemuurse aktiwiteite op ander plekke buite die skoolgronde het, moet in groepies daarheen stap (bv. Kuns by PJ Olivier) of ’n reëling met ‘n dorpsouer of afrigter tref vir vervoer (bv. dans of ballet) . Die koshuis vervoer slegs leerders na mediese afsprake wat self deur die koshuis gemaak word. Die koshuis kan ongelukkig nie leerders vervoer na ander afsprake, ekstra klasse of lughawe toe nie. Daar is heelwat betroubare privaatvervoer (bv. Shubble) wat gereeld deur leerders gebruik word.

Ons wil graag meer uitvind oor die koshuis- en leertye.
Daar is ‘n vaste struktuur aan hoe die dag by die koshuis verloop. Leerders dui hulle buitemuurse aktiwiteite op ‘n rooster aan. Daar is elke dag middagstudie van 15:30-16:25 asook aandstudie tussen 19:00-21:00 (met ‘n 15 minute breuk om 20:00). Leerders eet hul middagete tydens tweede pouse en mag dan reeds verklee vir hulle buitemuurse aktiwiteite na skool, voordat hulle die laaste periode van die skooldag bywoon. Tydens eerste pouses kan koshuisleerders broodjies en vrugte by die koshuis kom haal. Leerders mag hulle eie tablette of skootrekenaars tydens studie gebruik, maar daar is ook ‘n rekenaarstasie met rekenaars waar hulle aan take kan werk. Ligte-uit is saans om 22:00. Die koshuis is in seksies verdeel met ‘n HK-lid wat na elke seksie omsien. Elke gr 8 kry ook ‘n mentor wat hulle met die aanpassing help.

Watter ondersteuningsdiens is by die koshuis beskikbaar?
Die skool het ‘n Opvoedkundige sielkundige en skoolberader wat ook gratis diens aan koshuisleerders bied. ‘n Welstandsprogram word ook in die koshuis deur die Opvoedkundige sielkundige aangebied.

Ons stel belang in musiekonderrig. Wat bied Bloemhof?
Bloemhof bied verskeie opsies vir leerders wat musiek as vak wil neem. Meer inligting oor musiekonderrig is hier beskikbaar, maar navrae kan aan me. Suné van Wyk by musiek@bloemhofschool.co.za gerig word. 

Hoe bevorder die skool ‘n goeie en gesonde balans in leerders?
Ons skool se eerste fokusarea is gerig op akademiese vaslegging en vordering. Ons skep ‘n struktuur waarbinne ‘n goeie werksetiek aangemoedig word en kan plaasvind. Alhoewel akademiese toewyding en harde werk belangrik is, weet ons ook dat dit dikwels afhanklik is van gesonde emosionele en sosiale funksionering. Daarom moedig ons leerders aan om gesonde verhoudinge te bou; ‘n susterskap te kweek; deel te neem aan buitemuurse aktiwiteite waar hul talente ontwikkel en geniet kan word; en ook om genoegsaam te rus en te ontspan en realistiese doelwitte vir hulself te stel.

Behalwe vir akademiese ondersteuning, watter ander ondersteuningsdienste is beskikbaar?
Emosionele ondersteuning is gratis in die vorm van sielkundige of beradingsdienste op die skoolperseel beskikbaar
Bied Bloemhof enige leerondersteuning aan?
Bloemhof het ‘n tutorprogram. Die program fokus op die verlening van bystand deur tutors aan leerders wat akademiese hulp benodig soos versoek.

Is daar enige sielkundige dienste beskikaar?
Ja. Daar is ‘n Opvoedkundige sielkundige wat sielkundige dienste lewer in die vorm van terapie, assesserings en ouerleiding. Die skool het ook ‘n skoolberader wat beradingsdienste lewer.

Indien nodig, watter leerondersteuning bied die skool aan?
Daar is verskeie ondersteuningsopsies vir leerders beskikbaar:

• Alle opvoeders bied ekstra klasse vir hul vak aan.
• Daar is ’n tutorprogram beskikbaar waar senior leerders van die skool beskikbaar is om ander leerders akademiese te help.
• ’n Remediërende opvoeder is beskikbaar en leerders wat sukkel om die werk baas te raak, word na haar verwys.
• Die skool het ’n berader vir leerders wat wil gesels.
• Die skool het ’n opvoedkundige sielkundige wat assesseringsdienste bied.
• Die opvoedkundige sielkundige bedryf ’n LeesLab om leesvaardighede te verbeter.

Wat is die skoolfonds?
Skoolfonds vir 2025 beloop R50,400.00 per jaar. Die koshuis se losiesfooie (sonder wasgoed) is R47,000.

Doen julle beurse en wat is julle vereistes?
Ja, daar is één beurs – die Maggie Loubser-gedenkbeurs is vernoem na een van ons bekendste oudleerders.

• Dit vereis buitengewone prestasie in akademie, sport of kultuur en dek die volledige skoolfonds.
• Meer inligting kan by www.bloemhofschool.co.za/beurse gevind word.
• Let asb. daarop dat die Maggie Loubser-gedenkbeurs nie noodwendig elke jaar toegeken word nie. 

Wat is Bloemhof se selfoonbeleid? Hoe voel julle oor sosiale media vir kinders onder 18?
Navorsing het getoon dat om ‘n selfoon tydens akademiese kontaktyd fisies by jou te hou, onderbreek steeds die leerder se aandag, en dus optimale leer. Ons het dus ons selfoonbeleid onlangs aangepas deur leerders te vra om tydens hul lesse dit in te handig. Wanneer die opvoeder dit so verkies, mag leerders die selfoon gebruik om op bv. Google Classroom te werk. Dit bly die opvoeder se keuse.Ons is as skool ook uiters bewus van die gevare van sosiale media en poog dus om sodra die graad 8’s aanmeld, hulle in die gebruik en gevare hiervan op te voed. Natuurlik is niks hiervan moontlik as ouers nie ook dieselfde beginsels ondersteun nie.

Eversdal werk tans van gr.4 met tablette. Hoe geïntegreerd is Bloemhof tans?
Ons laat leerders toe om notas op hul tablette te maak, maar akkommodeer nie enige probleme rondom pap batterye, ens. nie. Navorsing toon ook dat indien leerders self notas maak, dit die leerproses verbeter.

Word rekenaars gebruik? Eversdal het van gr.4 af tablette.
Ons bied rekenaarsfasiliteite vir leerders wat take moet voltooi, asook die vak Rekenaars. In klasse verkies meeste leerders steeds om notas eerder in boeke te maak. Opsommings en huiswerk moet altyd getoon kan word – in ’n boek of op ’n tablet. Eksamens word skriftelik afgelê om leerders vir die NSS-eksamen aan die einde van hulle skoolloopbaan voor te berei.