Netbal is een van Bloemhof se gewildste sportsoorte en ‘n heerlike manier om in die winter aktief te bly. Ons het in tans 30 spanne wat in alle ouderdomsgroepe kompeteer. Daar word jaarliks met baie bekwame afrigters kontrakte gesluit om te verseker dat ons spelers die beste afrigting sal kry. Sasha-Lee Peters, ‘n voormalige speler vir Maties en lid van die Baby Proteas (2015-2016) en die Protea-groep (2019-2020), rig vanaf 2021 ons o.19A-span af. Bloemhof ding mee in die Boland-area en het ook jaarliks ‘n goeie kwota provinsiale spelers wat aan die SA-kampioenskappe deelneem. 

Die hoogtepunt op die netbalkalender is ons jaarlikse uitruil met Oranje Meisieskool van Bloemfontein. Ons kele is gewoonlik hees geskree na ‘n naweek van waardige kompetisie, al kan die skaal na enige kant toe swaai! Toernooie vir vanjaar sluit in: Quest for the Best, Menlo-toernooi, HMS Paarl-toernooi, La Rochelle-toernooi, Stellenberg-toernooi, Wildeklawer-toernooi, All Girls-toernooi Potchefstroom, SASN DSTV Skole-kampioenskap (Top skole), SASN Skole-kampioenskap (Top skole) sowel as die Fairtree Hokkie- en netbaltoernooi. 

In 2017 was Bloemhof se o.16A-span 2de en ons o.19A-span 4de in Suid-Afrika by die Nasionale Topskole Netbal-kampioenskappe in Boksburg. In 2018 eindig die o.14A-netbalspan vyfde by dié kompetisie en in 2019, tydens die Kay Motsepe Netbaltoernooi, palm hulle die silwer medalje in. In 2019 haal twee Bloemhoffers – Lenka Steenkamp en Ferren Linders – albei die SA o.16-span. Lenka is dan ook in 2021 as die kaptein vir die o.19A’s verkies.

Netbalorganiseerder:
Zelda Botha
E-pos: netbal@bloemhofschool.co.za
Tel: 021 887 3044

Hoofafrigter:
Sasha-Lee Peters
E-pos: netbalafrigter@bloemhofschool.co.za.