Carlin en Nell, eerstens: Veels geluk met julle verkiesing tot hoofleiers. Die leerders ken julle, maar as jy jouself in vyf woorde moes opsom, wat sou dit wees?

CARLIN: Betroubaar. Lojaal. Regverdig. Gedrewe. “Lag-te-veel”

NELL: Opreg, passievol, lojaal, gedrewe en simpatiek.

Waarna sien julle uit vir die termyn wat voorlê? 

NELL: Ek is vreeslik opgewonde vir die volgende termyn met die nuwe lede van die VRL. Ek is opgewonde om met my mede VRL te werk en hulle op ‘n dieper vlak te leer ken hierdie termyn. Om ons probleme saam aan te pak en nuwe idees op papier in ‘n werklikheid te omskep om sodoende die 150ste bestaansjaar van Bloemhof ‘n onvergeetlike jaar te maak.

CARLIN: Elke VRL-termyn waarin ek betrokke was, het telkens verskil. Hoewel daar tot ‘n mate dieselfde riglyne en patrone was, het ek die voorreg gehad om hierdie aspekte by uitstekende leiers aan te leer. Hierdie patrone is natuurlik van groot belang om orde te handhaaf. Wat ek egter bedoel met ‘verskil’ is die nuwe persoonlikhede en idees wat die VRL verryk, veral met betrekking tot die 2024/2025-termyn waarin die VRL nou betree. Bloemhof word 150 jaar oud en geen ander geleentheid skree ’n “nuwe fase” as hierdie feesviering nie. Ek is opgewonde vir die nuwe geleenthede en inisiatief wat met hierdie “nuwe fase” gepaard gaan, maar natuurlik lê die onbekende ook voor. Alhoewel die onbekende dikwels angs kan veroorsaak, is dit juis wat ambisie by my kweek om hierdie termyn entoesiasties aan te pak. Ek weet dat Jesus baie groter is as die onbekende en dat Hy reeds die pad vir ons as VRL uitgelê en fyn beplan het. Ek kan nou reeds op die res van die VRL staatmaak vir ondersteuning. Wie sê dat die onbekende altyd net vreesaanjaend is? Ek het die voorreg ontvang om die termyn aan te pak met een van my beste vriendinne, Nell Basson, en terselfdertyd sien ek so uit vir die nuwe verhoudinge wat tydens hierdie termyn gebou gaan word. Elke jaar waardeer ek die persoonlike ontwikkeling wat ek en die mense om my ondergaan, en ek sien uit daarna om die toekomstige ek oor ‘n paar maande te ontmoet.

Dis egter nie net die nuwe dinge wat my opgewonde maak nie, maar die voorreg om Bloemhof vir wie sy is en vir wie sy nog altyd was met al haar tradisies te verteenwoordig. Ek klou aan daardie Bloemhof wat ek as laerskoolkind waargeneem het toe my ouer sussies in die skool was- die enigste hoërskool wat trots by my gekweek het en wat al soos tuis vir my gevoel het al was ek nog nie deel van die skool self nie. Dit is ook waarvoor ek opgewonde is- om daardie gevoel by die nuwe graad ags te kweek. Sodat wanneer hulle die woord “Bloemhof” hoor, sprankel hul oë van trots.

Ek is nie op soek na ‘n “ander” Bloemhof nie, maar na die Bloemhof met nuwe inisiatief.

Wat is vir jou die lekkerste deel van Bloemhof?

CARLIN: Daar is soveel wonderlike aspekte van Bloemhof, maar die een wat vir my die meeste uitstaan, is dat ek elke oggend, wanneer ek by die skool afgelaai word, tuis voel. Bloemhof voel soos my tweede huis. My ander familie waar ek 700 ander sussies het, en ‘n veilige omgewing waar ek nie geoordeel voel nie. Dit is juis hoekom Bloemhof vir my so kosbaar is, aangesien dit ‘n veilige hawe vir baie jong dogters bied om hulle volle en ware potensiaal te bereik sonder enige onderbrekings. Die lesse wat ek oor die afgelope jare hier in Bloemhof geleer het, sal ek vir niks wil verruil nie en ek gee alle erkenning aan Bloemhof. Ek is ook mal oor die feit dat die leerders in Bloemhof uniek is, maar tog ‘n eenheid vorm. Dit is juis wat Bloemhof so besonders maak – die feit dat dit soveel geleenthede in verskillende velde aan die leerders bied en niemand beperk nie. Dit mag dalk bietjie “cliché” klink, maar wat Bloemhof die lekkerste maak is die mense. Daar is iets baie spesiaal aan Bloemhoffers.

NELL: Vir my is die lekkerste deel van Bloemhof definitief die ondersteuning wat jy ontvang van jou mede Bloemhof sussies en die ongelooflike herinneringe wat jy met hul kan maak in ‘n kort tydjie. Hoe baie geleenthede Bloemhof bied aan elke leerder en om te sien hoe almal om jou floreer, wat jou self inspireer om elke geleentheid wat oor jou pad kom, aan te gryp. 

CARLIN: Ek het vroeër in my lewe gedink dat daar van my verwag word om altyd die perfekte beeld aan my mede-leerders in Bloemhof voor te stel, sodat ek as voorbeeld dien. Dit het gelei tot vele uitdagende situasies en innerlike konflik. Met verloop van tyd het ek egter besef dat dit glad nie die geval is nie en het ek geleer om daardie denkwyses te laat gaan. Daar is ‘n massiewe verskil tussen die ‘perfekte dame’ en die unieke dame wat met die regte waardes opgevoed is. Bloemhof adverteer nie die ‘perfekte’ beeld aan die leerders nie, maar bied juis geleenthede aan jong meisies om hulself te wees, binne reëls en riglyne wat voordelig vir die skool kan wees. Om dieselfde reëls en riglyne as iemand anders te volg, maak julle nie dieselfde of perfek nie. Dit skep ‘n basiese fondament wat twee unieke individue in staat stel om, na skool, daardie algemene fondament te benut om in hul onderskeie lewenspaaie te presteer. Let wel: nie ‘perfekte persone’ nie, maar ‘unieke persone’.
Bloemhof leer jou om self te dink, en daarom kom die uitdagings nie altyd van Bloemhof se kant af nie, maar dikwels van jou eie kritiese denke. As ek een ding aan my mede-Bloemhoffers wil oordra, is dit dat jy altyd jouself moet bly, ongeag jou omgewing, posisie of situasie waarin jy jou bevind. Wees getrou aan jouself en respekteer die waardes en reëls wat aan jou geleer is. Integriteit is immers een van ons kernwaardes.

Wat is ‘n waardevolle les wat jy reeds geleer het en met ons kan deel?

CARLIN: Die waardevolste les wat ek geleer is, is om ‘n stukkie wysheid van elke persoon wat jy teëkom in jou lewe, saam met jou te neem en dit jou eie te maak. Natuurlik raai ek dit nie aan om om jou eie menswees te verloor nie, maar om juis uit ander se lewens te leer. Elke mens gaan deur die lewe en leer daagliks iets nuuts en ‘n nuwe les, maar daar is beslis nie sonder rede 7 Blijoen mense op hierdie aarde geplaas, net vir daardie een persoon om daardie les alleen te leer nie. Daar is ‘n rede hoekom flieks newekarakters het. Wees die hoofkarakter in jou storie, maar ag jou newekarakters as belangrik. Ek sou beslis nie die persoon gewees het wie ek vandag is nie, indien dit nie vir die mense was wat my lewenspad gekruis het en hier en daar ‘n merkie agtergelaat het nie. In samevatting, leer soveel as wat jy kan by ander mense en bid altyd vir wysheid.

NELL: ⁠Ek het geleer hoe kosbaar vriendskappe is en dat om jouself te omring met die regte mense, ‘n blywende indruk op jou karakter laat. Om jouself met ware hartsmense te omring, jou sal help om jou ware potensiaal te bereik en die uitdagende oomblikke op hoërskool net so klein bietjie beter te maak.

En laastens: As jy vir jou graad 8-self vandag iets kon sê, wat sal dit wees?

NELL: As ek iets vir my Graad 8-self nou kon sê, sou dit definitief wees om elke oomblik ten volle te geniet en nie te veel uit te sien na die volgende jaar op Hoerskool nie, maar om elke oomblik van hartseer en geluk in te neem, want dit sal binnekort net ‘n herinnering wees. Die lewe nie te ernstig op te neem nie, want jy hoef aan niemand jouself te bewys nie. Jouself met goeie vriendinne te omring, want hulle sal dien as jou ondersteuningsnetwerk vir die volgende 4 jaar. Om ook sterk te staan in wie jy is en waarin jy glo en te alle tye jou egte self te wees.

CARLIN: Ek sal eerlikwaar haar eers moet gerus stel, want as sy waarneem en sien waar ek my nou bevind, sal sy totaal en al my nie glo nie. Daarom sal ek graag vir haar wil sê om nooit, ooit moed op te gee nie. Moenie laat jou huidige omstandighede jou toekoms bepaal nie. Ek sal haar graag wil herinner dat Jesus ‘n mens in situasies plaas, juis om ‘n mens vir ‘n blink toekoms voor te berei. Ek sal beslis ook vir haar dankie moet sê, want sonder haar sou ek geen voorbeeld gehad het om van te leer en te groei nie. Ek sal egter ook vir haar dankie moet sê vir die feit dat sy so sterk gestaan het by dieselfde waardes wat ek steeds vandag het. Verskillende persone, maar ironies genoeg is daar juis verandering as gevolg van die standvastige waardes. En dan laastens sal ek vir haar ook natuurlik ‘n stywe drukkie gee. Om haar gerus te stel vir die sleg en goed wat vir haar voorlê- en ook grootliks dat ek ‘n drukkie mens is 😉