Wintersporttoekennings 2019

01 October 2019
| 14:13
| Nuus

Die Wintersporttoekennings is op 1 Oktober 2019 oorhandig. Veels geluk aan die leerders en spanne wat vereer is:

LANDLOOP

Juniorlandloopatleet van die jaar: Elandri Schmidt
Seniorlandloopatleet van die jaar: Cimòn van der Westhuizen

Elandri (graad 8) behaal vanjaar ’n algehele 3^de plek by die Wintersdaglandloopbyeenkoms teen Rhenish, verteenwoordig die Wes-Kaapspan vir landloop en neem aan die Suid-Afrikaanse (ASA) Landloopkampioenskappe in Pretoria deel.

Cimòn (graad 11) is net-net tweede tydens die Wintersdaglandloopbyeenkoms, maar behaal ’n eerste plek tydens die Interskole Landloop teen Oranje. Sy verteenwoordig die Wes-Kaapspan vir landloop en neem aan die Suid-Afrikaanse (ASA) Landloopkampioenskappe in Pretoria deel.

NETBAL

Juniornetbalspelers van die jaar: Ferran Linders & Lenka Steenkamp
Seniornetbalspeler van die jaar: Danica Fourie
Netbalspan van die jaar: o.15A

Ferran en Lenka (albei graad 10) deel vanjaar dié toekenning nadat albei van hulle as een van 12 spelers in die Suid-Afrikaanse o.16-span verkies is. Hulle is ook albei deel van die Wes-Kaapspan wat aan die Nasionale Kampioenskappe in Boksburg deelneem.

Danica (graad 12) is deel van die Wes-Kaapspan wat aan die Nasionale Kampioenskappe te Boksburg deelneem. Sy is ook ’n lid van die HMS Bloemhof Eerste Netbalspan wat ’n silwer medalje by die All Girls-toernooi verwerf en vanjaar se interskolestryd teen Oranje wen.

Die o.15A-span, vanjaar se netbalspan van die jaar, behaal ’n tweede plek by die Nasionale Topskole-kampioenskappe. Hulle is in 91,5% van hul 47 wedstryde onoorwonne. Die span het vanjaar 1 041 doele gedurende die seisoen aangeteken terwyl hulle opponente slegs in 405 doele kon slaag.

HOKKIE

Juniorhokkiespeler van die jaar: Jessica Hess
Seniorhokkiespeler van die jaar: Emma Bekker
Hokkiespan van die jaar: Bloemhof Investec o.19A

Jessica (graad 9) is vir die Boland o.16A-span gekies en is vanjaar ’n lid van die Bloemhof Investec Eerste Hokkiespan.

Emma (graad 12) verteenwoordig die Boland o.18A-span as onderkaptein en die Bloemhof Investec Eerste Hokkiespan as kaptein. Sy het vanjaar 29 doele vir haar span aangeteken – die meeste van alle hokkiespelers in Bloemhof.

Die o.19A’s, wat vanjaar agt Bolandspelers opgelewer het, is in 72,5% van hul 51 wedstryde onoorwonne. Hulle teken ’n totaal van 86 doele oor die seisoen aan en verloor slegs 14 van hul wedstryde. Die span se hoogtepunte sluit ’n 7^de plek by die St Mary’s Investec Hockey Festival , ’n 5^de plek by National All Girls’ Festival en ’n 9^de plek by die OMS Nasionale Super 12-toernooi in.