Meeste Bloemhoffers is nog te jonk om werklik te besef wie Zola Budd is, maar na dié wêreldberoemde atleet op 25 Januarie met die skool kom gesels het, het sy sommer 'n hele spul nuwe bewonderaars bygekry!

Zola, wat deesdae in Amerika woon, en tans op 'n publisiteitstoer deur Suid-Afrika is, het van die geleentheid gebruik gemaak om by Bloemhof aan te doen en 'n kort maar kragtige praatjie vir die leerders en personeel aan te bied. Op 45 neem sy nie meer aktief aan wedlope deel nie, en hoewel sy graag vanjaar die Comrades sal wil doen, is atletiek en draf deesdae bloot 'n manier om van ekstra spanning en energie ontslae te raak.

Sy het wel die leerders gemotiveer om die geleenthede wat hulle het ten volle te benut, op sport en kulturele front. Haar passie vir haar sport het haar die wêreld laat sien, maar ten spyte van haar beroemdheid en die soms moeilike pad wat sy moes stap, is sy steeds net die nederige kaalvoetmeisie van die Vrystaat.

Dit was 'n groot voorreg om Zola hier te kon verwelkom - ons wens haar alle sterkte toe vir haar toekoms.

Die Bloemhof Pluimbalspan het Suid-Afrika in die Afrika Skole Pluimbalkampioenskappe wat Desember in Pretoria gehou is, verteenwoordig. Bloemhof was onoorwonne by die SA Skoletoernooi in Augustus, maar op grond van die punte wat in die onderskeie eindstryde behaal is, is die span egter vir die Afrikakampioenskappe tweede geplaas na Hoërskool Diamantveld. Bloemhof het dus as die SA B-span in die Afrika-toernooi gespeel.

Agt Spanne van regoor Afrika het aan die toernooi deelgeneem en in die  rondomtalie-afdeling het Bloemhof al sewe die ander spanne, insluitend die SA A-span, getroef. Bloemhof het ongelukkig met 3-2 in die semi-finaal teen die SA A-span vasgeval en weens die span se eerste posisie na die rondomtalie-afdeling, is die span amptelik derde geplaas.

Baie geluk dames!